| NR-Kurier | |||
| Ihre Internetzeitung für den Kreis Neuwied | |||
| Pressemitteilung vom 23.07.2023 | |||
| Region | |||
| Mundartstammtisch: Feijen frejer und hout | |||
| Frejer hät mer dehäm ifeijert. Et woor och viell mien ifeijert bie hout. Meestens feijerte mer de Verlobung alt gruß. Die koam vierher en de Zeirung, inausu bie de Huchzeit. Die woor och vierher em Kasten bekannt imacht. Jeder, der get degent hat, konnt sich dann om Amt mellen. | |||
 Oberhonnefeld-Gierend. De standesamtliche Huchzeit un de Polteroamend woaren on ähnem Dach. Oft woar om nächste Dach de Huchzeit en de Kersch met vill Leijd. Poltern koamen de jonge Dorfsleijd. Erscht hon se isungen, dann goaf et Schnaps un Likör, doanoa goaf et en de Wirtschaft dann Beer. Die Huchzeitsisellschaft ging all metenanner zefoß en de Kersch. En Joarscheld un Strooß stallt de Tornverein, denn goaf et doa schon, en Menschepyramied off. Vier de Kersch stoanen Kenner un sperrten de Ausgang met em Streck, monchmoal met Bolmen dron, zoo. De Brautleijd mussten sich met Kleengeld freikoofen. Em ze feijern woor de goore Stuff ausirommt. Bei de Noaberschleijd lingt mer sich Stehl, Desch un Dellern. De Noaberschfrauen doaden backen un kochen. Oft koam noh neijn Mänt en Kend, deggeser och frejer. Dann soat mer, die mussten heiroren.De Kenddof woor och ifeijert. Eh et Kend idoft woar, durft mer net iwer de Schlenk goan. Meestens hatten de Kenner drei Padden. Von denn hät mer get on Chresdach un Ustern ikricht. Mädscher hon get vier de Aussteuer un Jongen Sackdejer un Stremp ischenkt krischt. Doamols wooren bal alle Kenner konfermert. Se mussten zwei Joahr lang, jede Woch, en de Unnerricht. Et erschte Joahr en de Kathechumänen- un et zweite Joahr en de Konfermandenunnerricht . Noch frejer gingen se sugar zweimoal en de Woch. De Konfermation feijerte mer och gruß. Doanoa goof et kähn Padde-Ischenke mien. Noa alle Feijern goaf et en Nohkaffie om nächste Dach fier all de Leijd aus em Dorf, die ischenkt hatten. Mer ging en alle Heijser, se enloren. Hout werd sich heimlich unnerm Chresbomm verlobt. Et werd och ni mie gruß ifeijert un nix mien bekannt igewen. Polteroamende geft et selten noch. Doafier gruße "Junggesellenabschiede", jeweils einzeln met de Brautleijd. Vill heiroren, wenn iwerhaupt, nur noch om Standesamt. Hauptsach met em weiße Kleed. Ifeijert wird mestens en de Wirtschaft, orrer et werd ähner zesamen itronken. De Kenner weren lang net mie all idoft orrer konfermert. Su hät sich alles iännert. Der nächste Mundartstammtisch findet im Backes in Gierend am 10. Oktober 2023 um 19 Uhr statt. Neue Mitglieder sind stets willkommen. (red) |
|||
|
|||
|
